පම්ප් එකක් දාමුද?

          ඊයෙ තවත් මීටින් දවසක්.මළ මගුල් ට්‍රැෆික් එකක් නිසා මං යනකොට අපේ ක්ලයන්ට් වෙන කස්ටිය ඇවිල්ලා ප්‍රොජෙක්ට් මැනේජර්ත් එක්ක රවුම දානවා.මාත් දඩි බිඩි ගාලා උදේට කියලා ගෙනාපු පාන් කෑලි ටිකත් කාලා දිව්වා සයිට් එකට.වෙලාවට ජයන්ති කුමාර සර්යි,නිශ්ශංක සර්යි ආවෙ ඒ වෙලාවෙමයි.වෙලාවට කිවාට  මං පරක්කු වුනා කියලා වැඩි අවුලක් දාන්නෙත් නෑ ඒ ගොල්ලො.

            මේ සයිට් එකේ ප්‍රධානම ඩිරෙක්ට කෙනෙක් වෙන්නෙ අපේ කැම්පස් එකේ ඩිපියුටි වයිස් චාන්ස්ලර් වෙන ප්‍රොෆෙසර් කෙනෙක්.ඒ නිසා කන්සල්ටන්, ආකිටෙක්ච්ර් අර ගොල්ලො මේ ගොල්ලො කවුරු හිටියත් මෙයා කියන විදිහට තමා වැඩ යන්නෙ.මේ කස්ටිය ම සෙට් වුනාම රස ආකරයක් එතන.

           ඊයෙත් ඉතිං සුපුරුදු ලෙස කස්ටිය එක තැනකට වෙලා ඉන්නකොට අපේ ප්‍රොෆෙසර් කියනවා ඇහෙනවා. "බලන්නකො ගාමිණි හරියට තෝරගන්න එකක් කියන්නෙ නෑ නෙ.එක්කො කියනවා ගෑනි කලුයි කියලා,නැත්නම් කියනවා කොන්ඩෙ දිග නෑ කියලා.මට ඉතිං මෙහෙම ගියොත් නොබැඳම තමා ඉන්න වෙන්නෙ."

                මේ මොන කුණුහරුපයක්ද..කසාද බැදලා ලමයිනුත් ඉන්න මේ වයසට ගිය ප්‍රොෆෙසර් ආයෙත් බඳින්න...:O.ඔන්න බොලේ ඊට පස්සෙ කියනවා "මට වෙන කරන්න දෙයක් නෑ.ඉතිං ගාමිණි මොනව කිව්වත් මට මේක කරන්නම වෙනවා.නැත්නම් මගෙ වැඩ පරක්කු වෙනවා.වෙන ඒවා වගේ නෙවෙයි අපේ රටේ දේ නිසා විස්වාසයි එක්කනෙ.අනික රිපෙයාර් එකකට වුනත් බඩු තියෙන නිසා බයත් නෑ.රිපෙයාර් කලාට පස්සෙ ආයෙත් මොනවද අලුත් වගේ තමයි."කියලා.

            වටේ හිටිය කස්ටියත් කියනවා "ඒකත් එහෙම තමයි කැඩුන බවක් මතකත් නෑ ජිවිත කාලෙටම." කියලා.මාව ඩිම් වුනා.මේ මොන හුට්ටපර කතාවක්ද මේ කියන්නෙ."ඒකනෙ එහෙනම් මම ජිනසේන පොම්ප ගන්න කොටේශන් එක දෙන්නම් එහෙනම්." මෙච්චර වෙලා ගෑනියෙක් ගැන කතා කරපු අය මෙන්න ඒ පාර පොම්පයක් ගැන කතාව.

            අප්පේ දැන් නෙ ටියුබ් ලයිට් එක පත්තු වුනේ.ඇත්තටම මේ කස්ටිය මෙච්චර වෙලා කතා කරලා තියෙන්නෙ සයිට් එකට ඕනෙ කරන පොම්පය මොන ජාතිය වෙන්න ඕනෙද කියන එක ගැන.ඔන්න එතකොටම මට අපේ සර්  (ගාමිණි සර්)  ගිය සතියෙ කියපු පොම්ප  කතාවත් මතක් වුනා.

           ජිනසේන පොම්ප අපේ රටේ සාඩම්බර නිෂ්පාදනයක්. ඉස්සෙල්ලා කියපු කාරනා ටික සහ පිරිසැකසුම ( fabricate කියන වචනෙට මධුර දුන්නෙ ඔය තේරුම.පුලුවන් නම්  ඔයිට වඩා සරල තේරුමක් කියනවද?) හොඳ නිසාම ලොකු බිල්ඩින් හදනකොට වතුර පොම්ප කරන්න මේවා යොදා ගන්න නිසි බලදාරියො හරිම කැමතියි.ඒත් ඉතිං කොහෙන්හරි කොස්සක් එනවාමනෙ.මේකෙත් තියෙනවා එහෙම එකක්.

           එක එක සයිට් වලට ඕනෙ වෙන්නෙ වෙනස් වෙනස් ෆ්ලො රේට් තියෙන ඒවානෙ.ඇයි ඉතිං වතුර ටැංකියේ ප්‍රමානය එහෙම වෙනස් නෙ.අපිට ඕනෙ ෆ්ලෝ රේට් එක මොකක් වුනත් ජිනසේන අය දෙන්නෙ එයාලා ගාව තියෙන ඒවාලු.ආයෙ ඉතිං අපිට ඕනෙ මේ තරම් කීවට ඕනෙ නම් ගනින් නැත්නම් නිකන් හිටපන් කියලා වෙනසක් නොකරම දීලා දානවලු.

පොම්ප වක්‍රයක්

             කස්ටිය සමහරු දන්නවා ඇතිනෙ පොම්ප වලට වක්‍රයක් කියලා තියෙනවා.පොම්පෙ තියන රවුම් තැන් ගැන නෙවෙයි කියන්නෙ හොඳේ.අර ගණිතයේ එහෙම තියෙන වක්‍ර හරිද.ඒවට අනුව එක ෆ්ලෝ රේට් එකකදි තමයි හොදම කාර්යක්ශමතාවය පොම්පෙ තියෙන්නෙ.ඒ කිව්වෙ ලබා ගන්න කරන්ට් එකෙන් වැඩි හරිය වතුර පොම්ප කරන්න ගන්නවා.

           

             ඒත් ඉතිං ජිනසේනලගෙ වැඩ නිසා සමහර වෙලාවට ඕනෙ ෆ්ලෝ රේට් එක ගන්න කොට කාර්යක්ශමතාවය 40% එන වෙලාවලුත් තියෙනවාලු.එතකොට 60% අපතේ.කොහොමද එතකොට කරන්ට් බිල....හිතා ගන්න කෝ.......

 

ප.ලි.

ගෙදරට ජිනසේන පොම්ප නම් දාලා තියෙන්නෙ බය වෙන්න එහෙම එපා. හරිය....මේවා ඉතිං වැඩිය අදාල වෙන්නෙ ලොකු,තට්ටු ගනන් තියෙන බිල්ඩින් වලට නෙව...